25. urteurrena | Jon Olaizola
4.2 EHUN FITXA ZITUEN KLUBA
Iraurgi S.B.z edozeini galdetuz
gero, denek frontoian bizi izan ziren urte paregabeez
hitz egin ohi dute. Sasoi hark izan zuen balioa kendu
gabe, 1991-93 epea izan zen Iraurgiren historian urterik
oparoena: zortzi talde izan zituen; bost mutilenak
eta hiru neskenak; ehun fitxa guztira.
1990-91 denboraldian, kadeteak Gipuzkoako txapeldun
geratu ziren, eta Euskal Herri mailan, Taukoei eta
Caja Bilbaokoei irabazi ondoren, Iruñekoen
kontra galdu zuten azken partidua. Xubi eta Aitor
Goenaga Ormaetxe aritu ziren entrenatzaile. Aitorrek
partidak ileko kiribil guztiak leunduta amaitu ohi
zituen, berak beti esan duen legez, beldurtzeko buruko
minarekin. Eliteko taldeen kadeteak menpean hartzeko
gai izan zen talde hura, eta bistan zen hango partaideek
etorkizun ona zutela; lana gogotik eginez edozein
helburu erdiets zitekeela zirudien.
MUTILEN SUB'23
Sub’23 mailan mutilen eta nesken talde bana
atera ziren: mutilen taldean antzina saskibaloian
ibilitako Pello Arizmendi, Pablo, Patxi Arruti eta
beste hainbatekin batera, Jon Arozenak jokatu zuen,
kanpeonato lokalak eman zuen azken izar disdiratsua
(2000-2001 denboraldian, Iraurgin, hiruko bat sartu
zuen, bere garai onenetako Odri gogora ekarriz). Entrenatzailea
Xanti Pattana izan zen. Xanti Iraurgiren lehenengo
urteetatik klubeko egitura guztietan parte hartua
da: jokalari hasieran, nesken entrenatzaile gero eta
klubeko zuzendaritzako kide urte luzeetan izan da,
orain dela oso gutxi arte egon delako bertan.
Esan beharra dago argi eta garbi ikus zitekeela saskibaloiak
izan zuen gorakadak goia joa zuela: kanpeonato lokalean
izena ematen zuten taldeak gero eta gutxiago ziren,
kiroldegira gerturatzen ziren ikusleen kopurua balekoa
izanik ez zen igo, eta taldearen inguruan zebilen
jendearen lanerako interesa epeltzen hasia zen.
