Iraurgi S.B.
castellano | euskera
Saskibaloian jokatzeko zegoen
gogo hartan aurrera egin eta 1972an bailaran eratu
zen estreinako talde federatua, jubenil mailan: Anaitasuna
Illarra. Azkoitiko futbol klubaren izena hartu zuten,
horrela federatu ahal izateko eskatzen ziren estatutuak
egiten hasi beharrik ez zutelako. Bestetik, Illarra
Azkoitiko jatetxeak diru laguntza eman zien, eta horrela
hasteko moduan zeuden. Azkoitian, Goiko Losan jokatzen
zuten. Lehenengo talde hartan Antton Juaristi, Jose
Mari Aldalur, Federico Aranbarri, Felix Mateos, Marcos,
Fari Garmendia, Esteban Urbieta eta Txotxe zeuden,
besteak beste. Entrenatzaile lanetan Candamio aritzen
zen; Olivetti idazmakinen komertziala zen Candamio
donostiarra, eta Seat 600 batean etortzen zen; saskibaloiarekiko
maitasun itsua zen, kasik eria, eta saskibaloiak barren-barrenetik
harrapatua zuen beste bat. Lan saioak zuzentzera etortzeaz
gain, ezpainetik kentzen ez zuen zigarro amerikar
gorriaz, asteburuan gazteak hartuta joaten zen zegokion
partida jokatzera, eta partida ondoren, nahiz eta
galdu, gazteei gustura ordaintzen zien hamaiketakoa.
Sasoi hartan, Urola bailaran saskibaloian jokatzea
mirari txiki bat zen. Lan saioak egiteko leku bat
izatea ez zen gutxi ordurako. Noizbait, Jesus y Mariasetan
aritu behar izan zuten Candamioren aginduetara: lurra
hartxintxarrekoa zen, zuloz beteta zegoen, jolas-eremuan
zuhaitzak zeuden, eta nahiko zailtasun izaten omen
zituzten zuhaitz haien blokeoetatik irteten.
