Giro hartan sortu zen proiektu berri bat, kanpeonato lokala deitu zitzaiona. Lagunartean saskibaloian jokatzeko aukera eman nahi zen. Uda partean jokatzen zen, txapelketak amaituta zeudenean eta eguraldi onak hasten zirenean. Soilik mutilentzako antolatzen zen. Eta oso partehartze zabala izaten zuen. Bertan, urte batzuk atzerago saskibaloian aritu zena, saskibaloia gogokoa zuen jende gaztea, inoiz bote bat eman ez zuen jendea... denetatik apuntatzen zen. Betharramdarretan giro bikaina izaten zen. Eta giro horretan, gerora Iraurgin partaide izan ziren hainbat jokalari berri sortu zen. Bide berri bat zen taldea indartzeko. Junior mailarako jokalariak arrantzatu ziren; lehendabiziko fruituak, besteak beste, Joseba Otaegi, Joseba Olazabal Txorrotxa, Xabier Errasti, Patxi Arruti, Lucas Olaizola, Josu Garmendia, Garagartza, Jesus Mari Goenaga Txiki, Mikel Arrieta, Mikel Larrañaga, Jose Luis Aldalur Marixa... izan ziren. Gerora gehiago etorri ziren: Aitor Egiguren, Ibon Arregi, Ibon Oiarzabal, Enekoitz Esnaola, Mikel Perez...

Iñaki Zubizarreta presidentea Joseba Otaegiri kanpeonato lokaleko sari bat ematen, Azpeitian, plazan. Eskuinean, Juan Inazio Madina.

Partiduen maila desberdina izaten zen, eta txapelketa bere bukaerarantz iristen zihoan neurrian, lehiaketa bera lagunartekoa izan arren, lehia sutsua izaten zen; han ez zen txantxarik izaten, eta epaile lanetan aritzen ziren Iraurgiko jokalariek hamaika arazo izaten zituzten.